ვესტიბულოკოქლეარული ნერვის დაზიანება (VIII ინტრაკრანიალური ნერვი)

ვესტიბულოკოქლეარული ნერვის დაზიანება გულისხმობს სმენის ნერვის ნევრიტის განვითარებას, ნევრიტი ანთებითი დაავადებაა, რომლის დროსაც ზიანდება ერთი (ლოკალური ნევრიტი) ან რამდენიმე პერიფერიული (პოლინევრიტი) ნერვი. ვესტიბულოკოქლეარული ნერვი იგივე VIII ინტრაკრანიალური ნერვი აკონტროლებს სმენითი ფუნქციის განხორციელებას.

გამომწვევი მიზეზები

სმენის ნერვის ნევრიტი ვლინდება ყურებში შიშინისა და ხმაურის შეგრძნებით და სმენის დაქვეითებით. მიზეზი მრავალფეროვანია. ყველაზე ხშირად ეს არის:

ინფექციური დაავადება
სხვადასხვა სახის პრეპარატი, მაგალითად, ანტიბიოტიკი, სიმსივნის საწინააღმდეგო საშუალებები
ალკოჰოლი და ნიკოტინი
ქალა-ტვინის ტრავმები
სისხლძარღვოვანი დაავადებები

სიმპტომები

სმენის ნერვის ნევრიტის დროს ვითარდება:

ყურებში სხვადასხვა ინტენსივობის ხმაურისა და შიშინის შეგრძნება
სმენის დაქვეითება
ცალმხრივი ან ორმხრივი სიყრუის განვითარება
წონასწორობის დარღვევა
თავბრუხვევა

მკურნალობა

სმენის ნერვის ნევრიტის მკურნალობა უნდა დაიწყოს რაც შეიძლება ადრე, ვიდრე დაზიანება ჯერ კიდევ არ არის გართულებული. ავადმყოფებს სჭირდებათ სასწრაფო ჰოსპიტალიზაცია და კომპლექსური მკურნალობა.