გულმკერდის აორტული განშრევება

სიკვდილიანობის მაღალი მაჩვენებლის გამო აორტის განშრევება მსოფლიო მასშტაბის პრობლემად არის მიჩნეული. აორტის დისექცია, იგივე აორტის განშრევება, მოსალოდნელია როგორც ანევრიზმის ანუ გაფართოებული აორტის, ისე გაუფართოებელი, ჩვეულებრივი ზომის აორტის შემთხვევაში. განშრევება შემდეგნაირად ხდება: აორტის კედელი, ისევე როგორც სხვა სისხლძარღვებისა, სამი შრისგან შედგება; ზოგიერთი დამაზიანებელი ფაქტორის ზემოქმედების შედეგად აორტის შიგნითა შრეზე ნახეთქი ჩნდება და სისხლი შრეებს შორის იჟონება, სისხლის ნაკადი კი აორტის გასწვრივ თანდათანობით აშრევებს აორტის კედელს.

გამომწვევი მიზეზები

გულმკერდის აორტული განშრევების მთავარი გამომწვევი მიზეზი მაღალი წნევაა. აორტის განშრევების მიზეზად შეიძლება იქცეს ასევე ნარკომანია, ათეროსკლეროზი, ზოგიერთი თანდაყოლილი გენეტიკური და შემაერთებელქსოვილოვანი დაავადებება. 

სიმპტომები

აორტის დისექცია უმეტესად ღამით, მოულოდნელად იჩენს თავს. ადამიანი გრძნობს ძლიერ, ხანჯლის ჩაცემის მსგავს ტკივილს, ასხამს ცივი ოფლი, რასაც ხშირად მოჰყვება კოლაფსის ნიშნები. მოცირკულირე სისხლის რაოდენობა მცირდება, წნევა დაბლა იწევს. შესაძლებელია განვითარდეს გულის ტამპონადა. 

მკურნალობა

მდგომარეობის გამოსწორებისთვის ყველაზე ეფექტური გზა ქირურგიური ჩარევაა.